16.06.2025-ci il tarixində saat 20:00 radələrində Respublika Təcili və Təxirəsalınmaz Tibbi Yardım Mərkəzinə Sumqayıt şəhərindən 75 yaşlı (qadın cinsli) şəxsin halının pisləşməsi səbəbilə çağırış daxil olub.
Mərkəzdən Aztibb.az-a bildirilib ki, çağırış əsasında təcili tibbi yardım briqadası ünvana cəlb edilib. Hadisə yerində xəstəyə ilkin tibbi yardım göstərilib. Elektrokardioqramma müayinəsinə (EKQ) əsasən pasiyentə ventrikulyar taxikardiya diaqnozu qoyulub.
Çağırış ünvanında xəstədə huşun tədricən itməsi və kritik vəziyyət müşahidə olunub.
Təxirəsalınmaz tədbir olaraq təcili tibbi yardım briqadası tərəfindən elektroimpuls terapiya (kardioversiya) icra edilib və bu prosesin ikinci dəfə tətbiqindən sonra pasiyentdə normal ritm bərpa olunub.
Pasiyent növbəti müayinə və müalicə məqsədilə müvafiq tibb müəssisəsinə təxliyə edilib.
