TƏBİB region xəstəxanalarında yararsız tibb avadanlıqların yeniləri ilə əvəz olunması və müasir standartlara uyğun tibbi avadanlıqların quraşdırılması və beləliklə ölkəmizdə səhiyyə infrastrukturunun yenilənməsi istiqamətində tədbirləri davam etdirir.

Aztibb.az TƏBİB-ə istinadla xəbər verir ki, növbəti yeniliklərdən biri də Samux Rayon Mərkəzi Xəstəxanası ilə bağlıdır. Tibb müəssisəsində ilk dəfə olaraq kompüter tomoqrafiyası (KT) xidməti istifadəyə verilib.

Yeni quraşdırılan KT 64 kəsimlidir. Avadanlıq kontrastlı və nativ çəkiliş, eləcə də 3D görüntüləmə, yüksək ayırdetmə və aşağı dozalı skanetmə qabiliyyətinə malikdir.

Kompüter tomoqrafiyası daxili orqanların, sümüklərin, yumşaq toxumaların və qan damarlarının təfsilatlı görüntüsünü əldə etmək üçün istifadə olunan şüa diaqnostikası metodudur. Bu metodun əsasını rentgen şüalarının istifadəsi təşkil edir.

Adi rentgen müayinəsindən fərqli olaraq, kompüter tomoqrafiyası bir sıra toxumaların, həmçinin ağciyərin, sümüklərin və qan damarlarının təfərrüatlı görüntüsünü verir, görüntüləməni real zaman rejimində təmin edir. Kompüter tomoqrafiyasının köməyi ilə təyin olunmuş diaqnoz, diaqnostik cərrahi müdaxiləyə və yaxud biopsiyaya ehtiyacı aradan qaldıra bilər.

Xatırladaq ki, pasiyentlər tibb müəssisəsində əvvəl KT müayinələri üçün digər dövlət və özəl tibb müəssisələrinə yönləndirilirdi.

TƏBİB mərhələli şəkildə bu xidmətin mövcud olmadığı digər tibb müəssisələrində də kompüter tomoqrafiyasının təşkilini nəzərdə tutur.