Sumqayıt Tibb Mərkəzinin (STM) tabeliyində olan tibb müəssisələrində "Fövqəladə hadisələrin nəticələrinin aradan qaldırılması zamanı mülki müdafiə orqan və qüvvələrinin idarə olunmasının təşkili" mövzusunda rəhbər heyətin mülki müdafiə məşqləri keçirilir.

STM-dən Aztibb.az-a bildirilib ki, növbəti belə məşq 1 nömrəli Şəhər Xəstəxanasında keçirilib.

Xəstəxananın baş həkimi Mətləb Musayevin və kollektivin iştirak etdiyi mülki müdafiə məşqində STM-nin Mülki müdafiə bölməsinin aparıcı mütəxəssisi Hicran Sərkərova çıxış edərək bildirib ki, məşqin keçirilməsində məqsəd rəhbər heyətə və işçilərə fövqəladə hadisələrin nəticələri aradan qaldırılarkən xilasetmə və digər təxirəsalınmaz işlərin təşkili və operativ olaraq yerinə yetirilməsi üzrə praktiki vərdişlər aşılamaqdır.

Baş həkim M. Musayev şərti siqnalı verərək, məşqin başlanmasını elan edib.

Mülki müdafiə məşqi 3 siqnal üzrə həyata keçirilib.

Çıxış edən Mülki müdafiə qərargahının üzvləri hər 3 halda təhlükələrin aradan qaldırılması istiqamətində həyata keçirilən tədbirlərdən geniş bəhs ediblər.

STM-nin direktor müavini, Fövqəladə hallar komissiyasının sədri İlkin Namazov çıxış edərək bu kimi məşqlərin tibb heyətinin mülki müdafiə sahəsində bilik və bacarıqlarının, eləcə də praktiki vərdişlərinin artırılmasında mühüm əhəmiyyət kəsb etdiyini vurğulayıb.

Uğurla reallaşdırılan məşqdən sonra əldə edilmiş nəticələr müzakirə olunub, aidiyyəti üzrə tapşırıqlar verilib.