Ağır vəziyyətdə Respublika Klinik Xəstəxanasına gətirilən 15 illik astma xəstəsi müalicədən sonra sabitləşdirilib.

Xəstəxanadan Aztibb.az-a bildirilib ki, 15 ildir bronxial astmadan əziyyət çəkən pasiyent Niyazova Raya ağır vəziyyətdə Respublika Klinik Xəstəxanasına müraciət edib. Uzun illər davam edən astma ilə yanaşı yüksək təzyiq və ürək problemləri də müşahidə olunan pasiyentin vəziyyəti dərhal Pulmonologiya şöbəsinin müdiri, həkim-allerqoloq Reyhan Paşayeva tərəfindən nəzarətə götürülüb.

Peşəkar yanaşma ilə pasiyent hərtərəfli müayinələrdən keçirilib və fərdi şəkildə hazırlanmış müalicə planı uğurla tətbiq olunub. Pulmonologiya şöbəsinin peşəkar kollektivinin səyi nəticəsində Niyazova Raya sağlamlığına qovuşaraq evə buraxılıb.

Pasiyent göstərilən diqqət və qayğıya görə Pulmonologiya şöbəsinin müdiri, Reyhan Paşayevaya, şöbənin kollektivinə və xəstəxana rəhbərliyinə səmimi təşəkkürünü bildirib.