ÜST-nin ölkə ofisinin nümayəndələrinin Azərbaycanda akkreditə olunmuş diplomatik korpusun tərkib hissəsi kimi Şərqi Zəngəzur və Qarabağa səfəri davam edir. Səfərin ikinci günü nümayəndələr Şuşa şəhərinə baş çəkib.

Bu barədə Aztibb.az-a ÜST-nin ölkə ofisindən xəbər verilib.

Səfər zamanı nümayəndə heyəti şəhərdə həyata keçirilən bərpa və inkişaf layihələri, tarixi və mədəniyyət abidələri ilə tanış olub, həmçinin xalq artisti və Milli Məclisin deputatı Polad Bülbüloğlu ilə görüşüb.

Nümayəndələri Prezidentin köməkçisi, Prezident Administrasiyasının Xarici siyasət məsələləri şöbəsinin müdiri cənab Hikmət Hacıyev müşayiət edib.

ÜST-nin Azərbaycandakı nümayəndəsi və Ölkə Ofisinin rəhbəri Dr. Hande Harmancı qeyd edib: “Burada hazırda həyat var. İnsanlar artıq yerləşib və həyat canlanır. Görünən odur ki, burada olduqca ciddi və məqsədyönlü investisiyalar yatırılır.”

ÜST Azərbaycanda sağlamlıq və rifahın artırılmasına yönəlmiş səyləri dəstəkləməyə davam edir və bu istiqamətdə Qarabağ regionunda həyata keçirilən işlərə öz töhfəsini verməyə hazırdır.