Naxçıvan Muxtar Respublikası Səhiyyə Nazirliyi tərəfindən “Naxçıvan Muxtar Respublikasının sosial-iqtisadi inkişafına dair 2023–2027-ci illər üçün Dövlət Proqramı”nın daha bir bəndi uğurla icra edilib. Proqrama uyğun olaraq tibb işçilərinin bilik və bacarıqlarının artırılması, eyni zamanda yerli təlimçi heyətinin formalaşdırılması məqsədilə Naxçıvan Muxtar Respublikası Seminar, Treninqlər və Simulyasiya Mərkəzi yaradılıb.

 

Bu barədə Aztibb.az-a Naxçıvan MR Səhiyyə Nazirliyindən xəbər verilib.

 

Bildirilib ki, u istiqamətdə işlərin davamı olaraq, Mərkəzin fəaliyyətinin təşkili və regionda sertifikasiya prosesinə hazırlığın təmin edilməsi məqsədilə ilkin mərhələdə 11 nəfər həkim-təlimçi Bakı şəhərinə ezam ediləcəkdir. Ezamiyyətdən əvvəl Naxçıvan Muxtar Respublikasının səhiyyə naziri Samiq Sadıxov həkimlərlə görüş keçirərək onlara müvafiq tapşırıqlarını və tövsiyələrini verib, təlim və simulyasiya imkanlarının bölgə səhiyyəsinin inkişafında mühüm əhəmiyyət daşıdığını vurğulayıb.