Azərbaycan Qida Təhlükəsizliyi İnstitutunda (AQTİ) ASAN könüllüləri üçün maarifləndirici görüş təşkil olunub.

AQTİ-dən Aztibb.az-a bildirilib ki, tədbir ASAN könüllüləri tərəfindən reallaşdırılan “Genetik mühəndislik” layihəsi əsasında baş tutub. Layihənin əsas məqsədi gənclərin biologiya, genetika və müasir elmi texnologiyalar sahəsində biliklərini artırmaq, onların bu sahədəki elmi fəaliyyətlərlə yaxından tanış olmalarına şərait yaratmaq olub.

İnfo-tur çərçivəsində iştirakçılar AQTİ-nin Milli Referens, Kompleks Tədqiqatlar, Mərkəzi Baytarlıq və Fitosanitar Laboratoriyalarında aparılan elmi-tədqiqat prosesi, genetik analizlər və biotexnoloji yanaşmalarla tanış olublar. Ekskursiya zamanı İnstitutun mütəxəssisləri gənclərə innovativ texnologiyaların tətbiqi və gələcək perspektivlər barədə ətraflı məlumat veriblər. Könüllülər laborator mühitdə aparılan real prosesləri yerində izləyib, mütəxəssislərlə interaktiv müzakirələrdə iştirak ediblər.

AQTİ nümayəndələri qeyd ediblər ki, bu cür təşəbbüslər gənclər arasında elmi biliklərin təbliği və kadr potensialının inkişafı baxımından mühüm əhəmiyyət daşıyır.