TƏBİB-in tabeliyində fəaliyyət göstərən tibb müəssisələri arasında ilk dəfə olaraq Yeni Klinikada icbari tibbi sığortanın Xidmətlər Zərfi çərçivəsində bilateral (ikitərəfli) bud-çanaq protezi əməliyyatı uğurla həyata keçirilib.

 

Yeni Klinikadan Aztibb.az-a bildirilib ki, uzun illər ağır dərəcəli displastik koksartrozdan əziyyət çəkən və yanaşı olaraq revmatoid artrit, psoriaz kimi autoimmun xəstəlikləri olan pasiyent eyni cərrahi müdaxilə ilə hər iki bud-çanaq oynağında süni implantlarla təmin olunub. Müxtəlif oynaqlarda deformasiya ilə müşayiət olunan bu mürəkkəb klinik hal – sağ bud-çanaq oynağında tam, sol oynaqda isə yarımçıq çıxıq şəklində özünü göstərib.

Əməliyyat texniki baxımdan yüksək çətinlik daşımasına baxmayaraq, uğurla başa çatdırılıb. Cərrahi müdaxilədən sonra pasiyent üç ildən sonra ilk dəfə olaraq sərbəst şəkildə yeriməyə başlayıb.

 

Əməliyyat travmatoloq-ortoped Tural Behbudsoyun rəhbərliyi və anestezioloq-reanimatoloq Lalə Əliyevanın iştirakı ilə həyata keçirilib.

 

İcra olunan əməliyyat həm ortopedik cərrahiyyənin inkişaf dinamikasını, həm də icbari tibbi sığortanın pasiyentlər üçün əlçatan və keyfiyyətli tibbi xidmət təmin etmək potensialını bir daha təsdiqlədi.