Respublika Klinik Xəstəxanasının Otorinolarinqologiya şöbəsində uzun müddətdir qulaq problemlərindən əziyyət çəkən Qarabağ qazisi, 1996-cı il təvəllüdlü Pərvin Umarov üzərində uğurlu cərrahi müdaxilə həyata keçirilib.

 

Xəstəxanadan Aztibb.az-a verilən xəbərə görə, bu, uzun müddətdən sonra şöbədə icra olunan ilk radikal mastoidektomiya əməliyyatıdır.

 

Pərvin Umarov illərdir sağ qulaqdan irin axması, eşitmə zəifliyi və baş ağrılarından əziyyət çəkirdi. Müxtəlif dövrlərdə dəfələrlə konservativ müalicələr alsa da, şikayətləri daha da kəskinləşib və vəziyyəti pisləşib.

 

Pasiyent Respublika Klinik Xəstəxanasına müraciət etdikdən sonra ona qulaq endoskopiyası, audiometriya və temporal sümük KT müayinələri aparılıb və nəticədə xroniki epitimezotimpanit, orta qulaqda polip diaqnozu təyin edilib.

 

Pasiyentə professor Nazim Hüseynov və şöbə müdiri Leyla Poladovanın iştirakı ilə radikal mastoidektomiya əməliyyatı həyata keçirilib.

 

Hazırda Pərvin Umarov stasionar müalicə və həkim nəzarəti altındadır, vəziyyəti stabildir.