TƏBİB-in təşkilatçılığı, EMDR Azərbaycan Assosiasiyası İctimai Birliyi ilə korporativ əməkdaşlıq çərçivəsində Yeni Klinikada psixoloq, psixoterapevt və psixiatrlar üçün ixtisasartırma təlimləri həyata keçirilib.

 

Aztibb.az TƏBİB-ə istinadla bildirir ki, təlimlərdə Yeni Klinika və Bakı Baş Səhiyyə Mərkəzinin tabeliyində fəaliyyət göstərən 21 mütəxəssis iştirak edib.

 

Təlimlər klinik psixoloq, EMDR (Göz Hərəkətləri ilə Duyğusuzlaşdırma və Yenidən Emal) terapevti, EMDR Avropa konsultantı (supervizor) və EMDR Azərbaycan Assosiasiyasının prezidenti Süleyman Məmməd-zadə tərəfindən aparılıb.

 

Həm nəzəri, həm də praktiki hissələrdən ibarət olan təlimin əsas məqsədi TƏBİB tabeli tibb müəssisələrində çalışan mütəxəssislərin EMDR metodunu təcrübədə tətbiq etməsi və peşəkar biliklərinin artırılmasıdır.

 

Qeyd edək ki, EMDR terapiyası əsasən post-travmatik stres, psixoloji travma, depressiya, panik atak və digər psixopatoloji pozuntuların müalicəsində tətbiq olunan effektiv psixoterapiya metodudur.