Mərkəzi Malidə aparılan 21 illik araşdırma nəticəsində əldə edilən məlumatlar yeni qidalanma siyasətlərinə istiqamət verə bilər. Miçiqan Universitetinin tədqiqatçıları tərəfindən aparılan uzunmüddətli araşdırma göstərir ki, uşaqlıq dövründə, xüsusən də 1-10 yaş arasında müşahidə olunan çəki artımı sonrakı dövrlərdə piylənmə və hipertoniya riskində nəzərəçarpacaq artım olmadan yetkin boy uzunluğu artırır.

Aztibb.az “MedicalXpress” portalına istinadla xəbər verir ki, nəticələr “JAMA Network Open” jurnalında dərc edilib.

Aparıcı tədqiqatçı, antropologiya professoru və Miçiqan Universitetinin Sosial Tədqiqatlar İnstitutunun üzvü Beverli Strassman bildirir ki, mövcud yanaşmaların bir çoxu uşaqlarda iki yaşdan sonra qidalanma müdaxilələrinin dayandırılmasını müdafiə etsə də bu strategiyalar uşaqların tam boy potensialına çatmasına mane ola bilər. “Əvvəlki tövsiyələr uşaqlarda çəki artımının sonradan piylənmə və yüksək qan təzyiqinə səbəb ola biləcəyinə dair narahatlığa əsaslanırdı. Lakin bizim araşdırmamız göstərdi ki, xüsusilə resursları məhdud olan və qida çatışmazlığı ilə üzləşən ərazilərdə bu cür çəki artımı əhəmiyyətli dərəcədə daha uzun boya səbəb olur və əlavə sağlamlıq riski yaratmır”, – deyə Strassman bildirib.

Araşdırma çərçivəsində tədqiqat qrupu Mərkəzi Malidə 1348 iştirakçını 21 il müddətində təkrar ziyarətlərlə izləyib. Nəticələr göstərib ki, uşaqların 1-10 yaş aralığında çəki artımı həm qadın, həm də kişilərdə 21 yaşa qədər daha uzun boya gətirib çıxarır.

Bu tapıntılar qida çatışmazlığı ilə üzləşən uşaqlar üçün 2 yaşından sonra da davam edən qidalanma dəstəyinin əhəmiyyətini vurğulayır. Tədqiqatçılar hesab edirlər ki, “ilk 1000 gün” konsepsiyası (doğumdan 2 yaşa qədər olan dövr) bütün uşaqlar üçün yetərli olmaya bilər və siyasətçilər bu məqamı nəzərə almalıdır.