Yay aylarında insanların ən çox sevdikləri istirahət növlərindən biri də dəniz və hovuzlara getməkdir. Bu cür gəzintilərin ən fərqli və maraqlı cəhəti isə qaralmaqdır. İnsanların çoxu nə yolla olur-olsun, qaralmağa can atır, saatlarla günün altında qalırlar.
Aztibb.az xəbər verir ki, Ümumdünya Səhiyyə Təşkilatı (ÜST) isə bu yaxınlarda qaralmanın dəri sağlamlığı üçün böyük təhlükə olduğuna diqqət çəkib.
Rəsmi qurumların elmi məlumatlarına görə, qaralmanın əsasını dərini zədələyən ultrabənövşəyi (UV) şüalar təşkil etdiyi müəyyənləşdirilmişdir. UV şüaları dəri hüceyrələrində DNT zədələnməsinə səbəb olaraq dəri xərçənginin yaranmasında mühüm rol oynayır. Günəş işığı dəri xərçənginin, xüsusən də melanomanın artmasında əhəmiyyətli faktor olaraq görülür. Bu məqamda mütəxəssislər xəbərdarlıq edirlər ki, günəş vannasının müddəti və tezliyi nəzarətdə saxlanılmalıdır.
