Səhiyyə Nazirliyi İctimai Səhiyyə və İslahatlar Mərkəzində (İSIM) müharibə veteranlarının iştirakı ilə “İnsan hüquqları aylığı” çərçivəsində tədbir təşkil olunub.

İSİM-dən Aztibb.az-a bildirilib ki, “Xüsusi Təyinatlıların Qaziləri, Şəhid Ailələri və Veteranları” İctimai Birliyi ilə əməkdaşlıqla keçirilən tədbirdə hüquq mədəniyyəti və hüquqi məsuliyyət, təhlükəsiz ətraf mühit və cəmiyyət, tütünçəkmə, narkomaniya kimi zərərli vərdişlərin təhlükəli fəsadları barədə ətraflı məlumat verilib.

Tədbir iştirakçıları ölkəmizin ərazi bütövlüyünün təmin olunması uğrunda canlarından keçmiş şəhidlərimizin əziz xatirəsini bir dəqiqəlik sükutla yad ediblər. İSİM-in direktor müavini Əliheydər Şahmarov, İSİM-in Səhiyyə kommunikasiyası şöbəsinin müdiri Laura Quliyeva, “Xüsusi Təyinatlıların Qaziləri, Şəhid Ailələri və Veteranları” İctimai Birliyinin rəhbəri Bəhruz Məmmədov çıxış ediblər. Veteranların hər birinin vətənpərvərliyinin, Vətənimizin müdafiəsində göstərdikləri şücaətin gənc nəsil üçün örnək olduğu vurğulanıb, əhalinin sağlamlığının möhkəmləndirilməsi istiqamətində ölkəmizdə həyata keçirilən məqsədyönlü tədbirlərin əhəmiyyəti diqqətə çatdırılıb.

İSİM-in baş hüquq məsləhətçisi Rüstəm Məmmədov insan hüquqları sahəsində mövcud çağırışlar, ölkəmizdə hər bir vətəndaşın sahib olduğu hüquqlar, milli səviyyədə həyata keçirilmiş fəaliyyətlər barədə ətraflı məlumat verib.

İştirakçılarla səmərəli fikir mübadiləsi aparılıb, İSİM tərəfindən hazırlanaraq çap olunan maarifləndirici materiallar təqdim edilib.