TƏBİB və Macarıstanın “Diagon” şirkətinin nümayəndələri arasında qarşılıqlı əməkdaşlığın müzakirəsi məqsədilə görüş baş tutub.
Görüşdə TƏBİB-in icraçı direktorunun müavinləri Araz Nəsirov və Anar İsrafilov, Macarıstanın “Diagon” klinik-diaqnostik avadanlıq istehsalı şirkətinin rəhbəri Jozsef Kern və digər rəsmi şəxslər iştirak edib.
Bu barədə Aztibb.az TƏBİB-in feysbuk səhifəsinə istinadla xəbər verir.
Görüş zamanı TƏBİB və “Diagon” şirkətinin fəaliyyət istiqamətləri haqqında məlumat mübadiləsi müzakirə olunub, tərəflər arasında klinik-diaqnostik avadanlıqların yerli tibb müəssisələrində tətbiqi, tibbi təchizatın texnoloji yenilənməsi, eləcə də gələcək əməkdaşlıq imkanları ətrafında geniş fikir mübadiləsi aparılıb.
Eyni zamanda, şirkətin rəhbəri Jozsef Kern və layihə meneceri Zoltan Edvi “Diagon”un fəaliyyəti barədə geniş təqdimatla çıxış edib.
Görüşün sonunda tərəflər əməkdaşlığın genişləndirilməsi istiqamətində aparılan danışıqların bundan sonra da davam etdirilməsi barədə razılığa gəliblər.
