Təsnifatına görə, qlaukoma anadangəlmə, açıq və qapalı bucaqlı olmaqla 3 qrupa bölünür. Anadangəlmə qlaukoma ön kamera bucağında hər hansı anatomik elementin çatışmazlığı səbəbindən yaranır. Açıqbucaqlı qlaukoma özlüyündə birincili və ikincili olur. Qlaukomanın birincili açıqbucaqlı növü adətən simptomsuz keçir. Xəstəlik, əsasən, ağrısız, xroniki və ləng inkişaf edir. Görmə sahəsində dərin dəyişikliklər baş verməyənə qədər pasiyentlərdə subyektiv şikayətlər olmur.

 

Qapalıbucaqlı qlaukoma zamanı isə simptomlar daha sərt gedişata malik olur. Ön kamera bucağında maye axını zamanı yaranan mexaniki blok nəticəsində gözdaxili təzyiqin kəskin artması müşahidə edilir. Bu da öz növbəsində kəskin ağrılara səbəb olur. Ağrılar, əsasən, gözdə, gicgahda, qaşüstü nahiyədə olur və ürəkbulanma, qusma, görmənin kəskin zəifləməsi, işıq ətrafında rəngli halqaların görünməsi ilə müşayiət edilir.

 

Bu barədə Aztibb.az-a Quba Rayon Mərkəzi Xəstəxanasının həkim-oftalmoloqu Gülşən Mehdiyeva bildirib.

 

Həkimin sözlərinə görə, qlaukomanın yaranmasında genetik faktorun rolu böyük olduğundan 3-6 aydan bir həkim-oftalmoloqlar tərəfindən müayinə olunmaq əsas profilaktik tədbirlərdən biridir: "Unutmaq olmaz ki, özünü xəstəliyin ən son mərhələsində bildirən və hiyləgər xəstəlik sayılan qlaukoma gec aşkarlandığında görmə sinirinə çox ciddi və bərpaolunmaz zədə vura bilər".