Qlaukoma müxtəlif səbəblərdən yarana bilir. Bu xəstəliyin yaranmasında irsi-genetik faktorlar mühüm yer tutur. Həmçinin gözdaxili maye axınının pozulması, gözdaxili təzyiqin artması, gözün daxili mayesinin normal axınının pozulması, yaşlanma, göz yaralanmaları, diabet və digər sağlamlıq problemləri kimi faktorlar səbəbindən də qlaukoma xəstəliyi meydana çıxa bilir. Kirpikli hissədə filtrasiya olunan maye arxa kameradan ön kameraya keçərək trabekula vasitəsilə şlem kanalına, oradan isə venoz sistemə qoşulur. Bu prosesin hansısa bir hissəsində problem yaşanarsa, onda göz daxilində mayenin miqdarı artır. Nəticədə gözdaxili təzyiq artır və ilk növbədə torlu qişada yerləsən sinirlər sıxılır. Zamanla görmə sinirinin atrofiyası və görmənin tam itirilməsilə nəticələnir.

 

Bu barədə Aztibb.az-a Qəbələ Rayon Mərkəzi Xəstəxanasının həkim-oftalmoloqu Şirəli Sadıqov məlumat verib.

 

Onun sözlərinə görə, qlaukoma daha çox orta və yaşlı insanlarda müşahidə edilir, amma yenidoğulmuşlarda və gənclərdə də rast gəlinə bilər. Simptomlarına gəlincə, ilk növbədə, əsasən göz ətrafında yüngül ağrılar, gözdə ağırlıq hissinin olması, sonralar isə görmənin və görmə sahəsinin tədricən azalması ilə özünü büruzə verir. Əsasən, gözdə olan ağrılar bəzən göz ətrafındakı nahiyəyə sirayət edir və baş ağrıları kimi də təzahür edir. Digər simptomlara isə görmənin getdikcə zəifləməsini, gözdə qızartıları misal göstərmək olar. Nəzərə almaq lazımdır ki, bəzən qlaukoma simptomlar olmadan da inkişaf edə bilər.