Təbii daşlardan biri olan kəhrəba dəbli aksessuar olmaqla yanaşı, həm də sağlamlıq üçün bir çox faydaları var. Kəhrəba milyonlarla il əvvəl ağaclardan sızan qatranların fosilləşməsi nəticəsində əmələ gələn təbii daşdır.

Aztibb.az xəbər verir ki, adətən, sarı, narıncı və qəhvəyi tonlarda olan kəhrəbadan boyunbağı, bilərzik, üzük kimi zinət əşyalarında tez-tez istifadə olunur. Həm estetik görünüşü, həm də sağlamlığa verdiyi faydaları ilə diqqət çəkən kəhrəba əsrlərdir insanlar tərəfindən sevilir. Bu təbii daşda olan kəhrəba turşusu bədənlə təmasda olduqda ağrıkəsici təsir göstərə bilər. Yeni diş çıxaran körpələrə adətən kəhrəba boyunbağı taxırlar.

Kəhrəba daşı enerji balanslaşdırıcı xüsusiyyətləri sayəsində zehni gərginliyi azaltmağa kömək edir. Stressdən azad olmaq və ruhi rahatlıq təmin etmək istəyənlər üçün təbii bir dəstək ola bilər. Alternativ təbabətdə kəhrəbanın immunitet sistemini dəstəklədiyi və orqanizmi xarici faktorlara qarşı daha davamlı etdiyi düşünülür.

Kəhrəbanın boğaz infeksiyaları, bronxit və astma kimi xəstəliklərə müsbət təsir etdiyi də iddia olunur. Bioenerji mütəxəssislərinin fikrincə, kəhrəba mənfi enerjini özünə çəkir və insana müsbət təsir edir. Bu baxımdan həm fiziki, həm də mənəvi enerjini tarazlamağa kömək edir.