22.04.2025-ci il tarixində gecə saatlarında Quba Rayon Mərkəzi Xəstəxanasının nəzdindəki Quba Regional Perinatal Mərkəzinə kritik-ağır vəziyyətdə olan 29 həftəlik hamilə müraciət edib.
Mərkəzdən Aztibb.az-a bildirilib ki, zəruri tibbi müdaxilələr göstərilən qadına eklampsiya diaqnozu qoyulub.
Regional Perinatal Mərkəzin tibb heyəti tərəfindən hamiləyə təxirəsalınmaz yardım göstərilib, hamiləlik təcili qeysəriyyə kəsiyi əməliyyatı ilə sonlandırılıb.
1100 qram çəkidə, ağır vəziyyətdə və vaxtından əvvəl doğulan körpədə ağır dərəcəli tənəffüs pozuntusu müşahidə olunduğundan körpəyə dövlət təminatlı “Curosurf 120 mq” preparatı yeridilib və 1 aya yaxın tənəffüs dəstəyi təmin olunub.
Görülən intensiv tədbirlər nəticəsində körpənin vəziyyəti müsbətə doğru dəyişib. Çəkisi 2 kq.-dək artıb, sərbəst tənəffüs etməyə başlayıb və ana südü ilə qidalanaraq normal həzm fəaliyyəti bərpa olunub.
Ana və körpəsi tam olaraq sağlam vəziyyətdə evə buraxılıblar.
