Uşaqlarda çəpər əyriliyi ən çox travmalar nəticəsində yaranır. Travmatik etiologiyalı deviasiyalar zamanı arakəsmənin qığırdaq hissəsinin çıxıqları da müşahidə olunur.

 

Bu barədə Aztibb.az-a Neftçala Rayon Mərkəzi Xəstəxanasının həkim-otorinolarinqoloqu Şölə İsmayılova məlumat verib.

 

Həkim bildirib ki, uşaqlarda burun tənəffüsünün çətinləşməsi, hipersekresiya, udlaqda quruluq, gecə sidik ifrazı hallarında baş verə bilir. Böyüklərdə isə daha çox sinusitlər, başağrısı, tez-tez zökəm zamanı rast gəlinir. Çəpər əyriliyi aşağı balıqqulağına toxunduğundan reflektor olaraq bronxial astma tutmaları və vazomotor rinit törədə bilər. Burun arakəsməsinin əyilmə səbəbi kəllənin üz hissəsi sümüklərinin qeyri-bərabər böyüməsidir ki, burun çəpərinin ayrı-ayrı hissələrinin sürətli və burun tağı dibinin ləng böyüməsi nəticəsində arakəsmə bu və ya digər tərəfə, bəzən də hər iki tərəfə əyilir. Belə hallarda arakəsmə S hərfinə bənzər formaya malik olur. O, raxit və travma ilə də müşahidə oluna bilər. Burun çəpərinin deviasiyası zamanı Killian tərəfindən təklif edilmiş selikli qişaaltı rezeksiya əməliyyatı icra olunur.

 

Onun sözlərinə görə, çəpər əyriliyinin yeganə müalicə üsulu cərrahi müdaxilədir. Cərrahi əməliyyat burun çəpərinin düzəldilməsi və çəpər əyriliyi səbəbindən yaranan sağlamlıq problemlərinin aradan qaldırılmasına istiqamətlənir.