Allerqoloq Nigar Həşimova məsələ ilə bağlı Aztibb.az-a bildirib ki, astma zamanı bronxlar, yəni ağciyərlərə hava aparan yollar həssas olur və müəyyən təsirlərlə daralır.

 

Həkim qeyd edib ki, bu zaman bronxlarda iltihab, şişkinlik və selik ifrazı artır. Bu da nəfəsalmanı çətinləşdirir. Astmanın əsas əlamətləri nəfəs darlığı, xırıltılı nəfəsalma, öskürək (xüsusilə gecə və səhər saatlarında), döş qəfəsində sıxılma hissi və s.-dir.

 

Nigar Həşimovanın sözlərinə görə, bu əlamətləri müşahidə edən şəxslər dərhal həkimə müraciət etməlidir. Xəstəliyin gedişatı fərdi olsa da, erkən müdaxilə və düzgün yanaşma ilə astma nəzarət altına alına bilər. Astmanın yaranmasına bir sıra faktorlar təsir edir. Allergiyalar — məsələn, toz, heyvan tükü, polen, soyuq hava, fiziki aktivlik, virus infeksiyaları və siqaret tüstüsü kimi kimyəvi təsirlər astmanı tətikləyə bilər.

 

Allerqoloq bildirib ki, astma xəstələrinə ən çox tətbiq olunan müalicə üsullarından biri inhalyatorlardır. Bu dərmanlar ya bronxları genişləndirir, ya da iltihabı azaldır. Bundan əlavə, profilaktik tədbirlər — yəni allergenlərlə təmasdan qaçmaq, düzgün həyat tərzi və daimi həkim nəzarəti müalicənin vacib hissəsidir. Bronxial astma müalicə oluna bilən deyil, nəzarətdə saxlanıla bilən bir xəstəlikdir: "Dərmanların vaxtında və düzgün qəbulu ilə astmalı şəxslər tam normal həyat tərzi sürə bilərlər".