Mayın 21-də 1960-cı il təvəllüdlü pasiyent – Xalq şairi Dərgahquluyev Hüseyn Şəmistan oğlu baldır sümüyünün tam qırılması və ayrılması, yumşaq toxumaların, əzələlərin, sinirlərin, vətərlərin, arteriya və venaların ciddi zədələnməsi, güclü açıq qanaxma və şok vəziyyəti diaqnozları ilə Qazax Rayon Mərkəzi Xəstəxanasına hospitalizasiya olunub.

 

Qazax RMX-dan Aztibb.az-a bildirilib ki, o, ot biçərkən otbiçən cihazın qəfil qırılması nəticəsində sağ baldırın aşağı 1/3 hissəsindən ağır travma alıb.

 

Pasiyent dərhal travmatoloq Fəxrəddin Əliyev və ümumi cərrah Şəhriyar Dağıstanlı tərəfindən təcili əməliyyata alınıb. Əməliyyatda qırılmış və kəsilmiş sümüklərin rekonstruksiyası, zədələnmiş damar, sinir, əzələ və vətərlərin bərpası, ayağın orijinal anatomik struktura uyğun olaraq yerinə tikilməsi icra olunub. Nəticədə pasiyentin ayağı amputasiya edilməkdən xilas olunub.

 

Müalicəsi Qazax Rayon Mərkəzi Xəstəxanasında davam edən şəxs iyunun 3-də vəziyyəti qənaətbəxş qiymətləndirilərək ambulator müalicə üçün evə buraxılıb.