Azərbaycan Tibb Universitetində (ATU) “Sağlam həyat – etibarlı gələcək” adlı maarifləndirmə aksiyası keçirilib.

 

Səhiyyə Nazirliyi Respublika QİÇS-lə Mübarizə Mərkəzini (RQMM) təşəbbüsü ilə təşkil olunan aksiyada universitetin tələbələri iştirak ediblər.

 

Bu barədə Aztibb.az-a RQMM-dan xəbər verilib.

 

Universitetin Tərbiyə işləri üzrə prorektoru, dosent Mahir Səfərov belə bir tədbirin keçirilməsinin zərurətdən yarandığını qeyd edib: “İİV/QİÇS mövzusu təkcə bizim deyil, eyni zamanda bəşəriyyətin problemidir. Doğrudur, xəstəliyə qarşı mübarizədə xeyli işlər görülməsinə baxmayaraq, bu istiqamətdə maarifləndirmə işinin aparılmasına da ehtiyac olduğunu qeyd edib.

 

Tədbirdə iştirak edən RQMM-in direktoru Famil Məmmədov və direktor müavini Günəş Cəfərova dünyada və Azərbaycandakı mövcud epidemioloji vəziyyətə diqqət çəkiblər. Mütəxəssislər ali təhsil ocağının tələbələrinə sağlamlığa ciddi təhlükə olan İnsanın İmmunçatışmazlığı Virusu (İİV) və Qazanılmış İmmun Çatışmazlığı Sindromu (QİÇS) haqqında geniş məlumat veriblər. Təcrübəli həkimlər xəstəlik və virusun yoluxma yolları, profilaktikası, müayinəsi və müalicəsi ilə bağlı təqdimatla çıxış ediblər.

 

Mərkəzdə müayinə və müalicənin anonim, ödənişsiz qaydada icra olunduğu, vaxtında müəyyən edilən diaqnozla ölüm hallarının qarşısının alınmasının mümkünlüyü tədbir iştirakçılarının diqqətinə çatdırılıb. Mütəxəssislərə ünvanlanan fərdi suallar cavablandırılıb, İİV/QİÇS-ə aid broşurlar, bukletlər paylanıb.