Kəskin respirator virus infeksiyaları (KRVİ) – kəskin yoluxucu virus xəstəliklərini özündə birləşdirir. KRVİ infeksion toksikozun ümumi əlamətləri və əsasən tənəffüs yollarının selikli qişasının zədələnməsi ilə xarakterizə olunur. KRVİ əsasən uşaqlarda müşahidə olunur.

 

Bu barədə Aztibb.az-a Xocavənd Rayon Mərkəzi Xəstəxanasının pediatrı Zeynəb Rüstəmova məlumat verib. Həkim bildirib ki, ilk 3 ayında olan uşaqlar anadan aldıqları passiv immunitetin nəticəsində nadir hallarda xəstələnirlər. Hərarətin yüksəlməsi, əzginlik, halsızlıq, əzələ və oynaq ağrıları, başgicəllənmə, iştahsızlıq, yuxu pozğunluğu, ürək bulanma, qusma, kataral boğaz ağrısı, burun tutqunluğu, burun qanaxması kimi simptomlar kəskin respirator virus infeksiyalarının əsas əlamətləridir. Eyni zamanda, yumşaq damaqda kiçik papulyoz enantema, qansızmalar, damaq badamcıqlarında ödəm ola bilər.

 

Onun sözlərinə görə, intoksikasiya, petexial səpgilər, tərləmə, qarında ağrı və ishalkimi siptomlar da KRVİ-nin əlamətlərinə aiddir. Xəstəliyin müalicəsi ağırlıq dərəcəsindən asılıdır. Profilaktika məqsədilə xəstələnən şəxslərlə təmas mümkün qədər məhdudlaşdırılır.

 

"Tərkibində vitamin və minerallarla zəngin qidalardan olduqca çox istifadə etmək önəmlidir. Otağın havası tez-tez dəyişdirilməlidir. Əllər antibakterial sabunla tez-tez yuyulmalıdır. İnfeksiyanın yayılmasının qarşısını almaq üçün asqırma və öskürmə zamanı burun və ağız boşluğu birdəfəlik dəsmalla qapanmalıdır.

 

Normal yuxu saatı təxmini 8-10 saat olmalıdır. Günün çox hissəsini təmiz havada olmaq vacibdir. Vaxtaşırı aktiv dincəlmək lazımdır. Zeynəb Rüstəmova son olaraq qeyd edir ki, hər bir şəxs sağlamlığının qeydinə qalmalı və vaxtında həkimə müraciət etməlidir.Əks halda ciddi prolemlərlə qarşılaşmaq qaçılmazdır", - deyə Zeynəb Rüstəmova əlavə edib.