Hər il 31 may tarixində dünya ictimaiyyəti Ümumdünya Tütünsüz Gününü qeyd edir.

Aztibb.az xəbər verir ki, bu təşəbbüs 1988-ci ildə Ümumdünya Səhiyyə Təşkilatı tərəfindən irəli sürülüb və məqsədi – tütün istifadəsinin yaratdığı təhlükələrə diqqət çəkmək, sağlam həyat tərzini təşviq etməkdir.

Statistikaya nəzər salsaq, mənzərə olduqca narahatedicidir: hər il tütün istifadəsi ilə bağlı 6 milyondan çox insan həyatını itirir. Bu rəqəmə təxminən 600 min passiv siqaret çəkənlər – yəni tütün tüstüsünə istəmədən məruz qalan insanlar da daxildir.
Tütün – yalnız bir vərdiş deyil, səssiz qatildir. Siqaret ağciyərləri sıradan çıxarır, xərçəng, xroniki bronxit, ürək-damar və bir çox digər ölümcül xəstəliklərin yaranmasına zəmin yaradır. Hamiləlik dövründə tütünə məruz qalan körpələrdə isə ciddi inkişaf gerilikləri müşahidə olunur.

Aktiv siqaret çəkənlərlə yanaşı, passiv şəkildə siqaret tüstüsünə məruz qalan insanlar da – xüsusilə uşaqlar və yaşlılar – bu təhlükəli təsirlərlə qarşı-qarşıya qalırlar. Təsəvvür edin: tütün tüstüsündə 7000-dən çox kimyəvi maddə, onlardan 69-u isə xərçəng törədən maddələrdir! Üstəlik, siqaret çəkmək 30-dan çox xəstəliyin yaranmasına və ağırlaşmasına səbəb olur. Siqaret çəkən insanların ömrü orta hesabla 14 il daha qısadır. Onkoloji xəstəliklərə tutulma riski 17 dəfə, infarkt və insult keçirmə ehtimalı isə 2-4 dəfə daha çoxdur.

Bu gün – 31 may – bizə bir daha xatırladır. Gəlin tütünə yox deyək, təkcə özümüzü deyil, yaxınlarımızı da bu təhlükədən qoruyaq.