Mərkəzi Gömrük Hospitalında 1 İyun-Uşaqların Beynəlxalq Müdafiəsi Günü münasibətilə balaca pasiyentlər üçün maarifləndirici aksiya təşkil olunub.
Gömrük Hospitalından Aztibb.az-a bildirilib ki, aksiya çərçivəsində hospitalın rəisi-baş həkim, tibb elmləri doktoru Bəxtiyar Musayev, rəis müavini Nabil Seyidov, poliklinika şöbəsinin rəisi Tamilla Əliyeva, pediatrlar və müxtəlif ixtisaslı həkimlər stasionar və ambulator müalicə alan uşaqlarla görüşüb, onların sağlamlığı ilə bağlı faydalı tibbi tövsiyə verib və hədiyyələr təqdim ediblər.
Həmçinin tədbir zamanı uşaqların mütəmadi tibbi müayinələrdən keçmələrinin vacibliyi bir daha önə çəkilib. Bildirilib ki, xəstəliklərin erkən diaqnostikası uşaqların sağlamlıq vəziyyətinin düzgün qiymətləndirilməsi ilə yanaşı, müxtəlif xəstəlik və patologiyaların aşkarlanaraq qarşısının alınmasında mühüm rol oynayır.
Aksiyanın əsas məqsədi valideynlərin və uşaqların diqqətini sağlamlıq mövzusuna yönəltmək, profilaktik tədbirlərin əhəmiyyətini vurğulamaq və uşaqlar arasında sağlam həyat tərzinin təbliğinə dəstək olmaqdır.
