Azərbaycan Respublikası Səhiyyə Nazirliyi və Naxçıvan Şəhər İcra Hakimiyyətinin dəstəyi, Naxçıvan Muxtar Respublikası Səhiyyə Nazirliyi və Azərbaycan Pediatriya Cəmiyyətinin birgə təşkilatçılığı ilə Naxçıvan şəhərində “Müasir pediatriyanın işığında” adlı elmi-praktik konfrans keçirilib.

Naxçıvan Muxtar Respublikası Səhiyyə Nazirliyinin mətbuat xidmətindən Aztibb.az-a bildirilib ki, əvvəlcə qonaqlar Ümummilli Lider Heydər Əliyevin abidəsini ziyarət edib, önünə gül dəstələri qoyublar. Sonra muzeylə tanışlıq olub.

Konfransda Ümummilli Lider Heydər Əliyevin və ölkəmizin ərazi bütövlüyü uğrunda canından keçən şəhidlərimizin əziz xatirəsi bir dəqiqəlik sükutla yad edilib, Dövlət Himni səsləndirilib.

Naxçıvan Muxtar Respublikasının səhiyyə naziri Samiq Sadıxov konfransın əhəmiyyətindən bəhs edib. Sonra Azərbaycan Pediatriya Cəmiyyətinin sədri Əli Quliyev tədbir iştirakçılarını salamlayaraq ölkədə uşaq sağlamlığının qorunması istiqamətində həyata keçirilən işlər və qarşıya qoyulan hədəflər barədə məlumat verib.

Konfransın elmi hissəsində ölkənin müxtəlif bölgələrindən dəvət olunmuş pediatr və tibb mütəxəssisləri tərəfindən müasir pediatriyanın aktual mövzuları üzrə məruzələr təqdim olunub, yeni tibbi yanaşmalar və metodlarla bağlı geniş müzakirələr aparılıb.