Səhiyyə Nazirliyi Respublika Qan Bankının 10 nəfərlik nümayəndə heyəti Türkiyənin paytaxtı Ankara şəhərində səfərdə olub.

Aztibb.az-a Nazirlikdən verilən xəbərə görə, səfər çərçivəsində nümayəndə heyəti Türkiyə Kızılay rəhbərliyi ilə görüşlər keçirib.

Ankara Kızılayın rəhbəri professor Fatma Meriç Yılmazın başçılığı ilə təşkil olunan görüşdə tərəflər arasında gələcək əməkdaşlıq imkanları və birgə reallaşdırıla biləcək təşəbbüslər müzakirə edilib.

Üç gün davam edən səfər müddətində nümayəndə heyəti Kızılayın fəaliyyət istiqamətləri ilə yaxından tanış olub, qan xidməti sahəsində beynəlxalq təcrübənin öyrənilməsi məqsədilə təqdimat və müzakirələrdə iştirak edib.

Görüş proqramı hər iki tərəfin səfərin yekunlarına dair ümumi qiymətləndirməsi və gələcək əməkdaşlıq perspektivlərinin müəyyənləşdirilməsi ilə başa çatıb. Eyni zamanda, “Türkiyə Qan Xidməti Şəbəkəsi” çərçivəsində qarşılıqlı iş birliklərinin qurulması imkanları da nəzərdən keçirilib.