Mərkəzdən Aztibb.az-a bildirilib ki, tibb müəssisəsinin şəxsi heyətinin iştirak etdiyi tədbirdə Kürdəxanı Sağlamlıq Mərkəzinin baş həkimi Ceyran Əhmədova çıxış edərək böyük tarixi şəxsiyyət Heydər Əliyevin həyat və fəaliyyəti barəsində ətraflı məlumat verərək, bildirib ki, Ulu Öndər Azərbaycanın müstəqil dövlət kimi mövcudluğunun qorunması və hərtərəfli inkişafı naminə göstərdiyi misilsiz xidmətləri ilə hələ sağlığında xalqımızın qəlbində öz əbədi heykəlini ucaltmışdır:

 

“Güclü siyasi iradəsi, qətiyyəti və uzaqgörənliyi, yüksək intellekti, əzmkarlığı və fədakarlığı, zəngin idarəçilik təcrübəsi ilə Vətən qarşısında xilaskarlıq missiyasını uğurla yerinə yetirən Heydər Əliyev adını Azərbaycan tarixinə qızıl hərflərlə yazmışdır. Vətəninə və xalqına, milli dəyərlərə və ənənələrə sıx bağlı olan dahi şəxsiyyət dövlətçilik maraqlarına hər zaman xüsusi həssaslıqla yanaşmış və milli mənafeləri hər şeydən üstün tutmuşdur. Ölkəmizdə səhiyyənin inkişafı və peşəkar tibbi kadrların hazırlanması Heydər Əliyevin adı ilə bağlıdır. Ümummilli Liderin bilavasitə rəhbərliyi ilə ölkənin səhiyyə sistemində ardıcıl və məqsədyönlü işlər görüldü, islahatlar aparıldı. Bu işdə ilk növbədə səhiyyənin hüquqi–normativ bazasının təkmilləşdirilməsi və dünya standartları səviyyəsinə qaldırılması daim diqqət mərkəzində saxlanılırdı. Bu məqsədlə Milli Məclis “Əczaçılıq fəaliyyəti haqqında”, “Özəl tibbi fəaliyyət haqqında”, “Tibbi sığorta haqqında” və bir sıra digər qanunlar hazırlayıb və təsdiq edib. Heydər Əliyev Azərbaycanın səhiyyəsində savadlı həkimlərin yetişməsi üçün əlindən gələni əsirgəməyib. Onun üçün ən vacib sahə insanların sağlamlığı, səhiyyə və tibb elminin inkişafı, bu sahənin peşəkar, savadlı kadrlarla təmin edilməsi olub. O dövrdə Onkoloji, Kardioloji, Ürək Cərrahiyyəsi, Oftalmoloji Mərkəzlərin yaradılması və inkişaf etdirilməsində, maddi-texniki bazasının möhkəmləndirilməsində ulu öndərin rolu danılmazdır”.

 

Tədbirdə Ümummilli Lider Heydər Əliyevin əhalinin sağlamlığının qorunması üzrə müəyyənləşdirdiyi kursun müasir dövrümüzdə cənab Prezident İlham Əliyev tərəfindən davam etdirildiyi, məhz onun təşəbbüsü ilə ölkəmizdə icbari tibbi sığortanın tətbiqi və eləcə də TƏBİB-in yaradılması ilə yeni tibbi- siyasi xəttin formalaşması nəticəsində əldə olunan nailiyyətlərdən də danışılıb.