66 yaşlı şəxs (kişi cinsli) kəskin baş ağrısı, başgicəllənmə, qulaqda küy, nitqin zəifləməsi və sağ ətraflarda hərəkətin məhdudlaşması şikayətləri ilə Kliniki Tibbi Mərkəzin (KTM) Təcili və Təxirəsalınmaz Tibbi Yardım şöbəsinə qəbul olunub.

 

KTM-dən Aztibb.az-a verilən xəbərə görə, aparılan təcili müayinələr nəticəsində pasiyentə sol beyin yarımkürəsində kəskin işemik insult diaqnozu qoyulub və dərhal Reanimasiya şöbəsinə yerləşdirilib.

 

Anamnezində göstərilir ki, pasiyent daha əvvəl yol-nəqliyyat qəzası nəticəsində kəllə-beyin travması alıb, miokard infarktı və hemorragik insult keçirib. Son 10 ildir ki, şəkərli diabet diaqnozu ilə ambulator müalicə alır.

 

Reanimasiya şöbəsində aparılan intensiv müalicə tədbirləri nəticəsində xəstənin vəziyyəti stabilləşib və o, Nevrologiya şöbəsinə köçürülüb. Həkim-nevroloq Durna Ələkbərovanın apardığı müalicələr nəticəsində pasiyentin səhhətində müsbət dinamika müşahidə olunub.

 

Hazırda pasiyent Nevrologiya şöbəsində stasionar müalicəsini davam etdirir. Vəziyyəti qənaətbəxş qiymətləndirilir və yaxın günlərdə nevroloqun nəzarətində ambulator müalicə üçün evə buraxılması planlaşdırılır.