Abşeron Rayon Mərkəzi Xəstəxanasının tabeliyində fəaliyyət göstərən Pirəkəşkül Ailə Sağlamlıq Mərkəzində tibbi aksiya keçirilib.

Abşeron RMX-dan Aztibb.az-a verilən məlumata görə, sakinlərin tibbi xidmətlərini əlçatanlığını təmin etmək üçün xəstəxananın ixtisaslı mütəxəssisləri (kardioloq, endokrinoloq, nevroloq, oftalmoloq, radioloq, terapevt, ginekoloq) cəlb edilib.

Ultrasəs (USM), elektorkardioqramm (EKQ), laboratoriya və s. kimi xidmətlər olmaqla ümumilikdə 270 nəfərə 557 xidmət göstərilib.

Aksiyada qəsəbə sakinləri ixtisaslı həkimlərə müraciət edərək, tibbi xidmətdən yüksək səviyyədə faydalanıblar.

Həmçinin keçirilən aksiyanın yüksək şəkildə təşkil olunması və xidmət keyfiyyətinə nəzarət etmək üçün Abşeron Rayon Mərkəzi Xəstəxanasının direktoru Səkinə Sadıxova, İlkin səhiyyə xidməti üzrə direktor müavini Kazım Məmmədov, İlkin səhiyyə xidməti şöbəsinin müdiri Faris Musayev iştirak edib.

Xatırladaq ki, layihənin məqsədi rayonun müxtəlif ərazilərində yaşayan vətəndaşlara yerində, daha əlçatan və keyfiyyətli xidmətin göstərilməsidir. Səyyar təşkil olunan bu aksiyaların mütəmadi olaraq icrası planlaşdırılır.