Şabran Rayon Mərkəzi Xəstəxanasında gənc qadının həyatı xilas edilib.

Xəstəxanadan Aztibb.az-a bildirilib ki, 1995-ci il təvəllüdlü qadın həyati təhlükə yaradan vəziyyətdə — uşaqlıqdan kənar boru hamiləliyi (ektopik) və daxili qanaxma diaqnozu ilə Şabran Rayon Mərkəzi Xəstəxanasına yerləşdirilib. Gərgin keçən anlarda tibb heyətinin operativ müdaxiləsi nəticəsində xəstəyə uğurlu əməliyyat icra olunub, qan və qan əvəzedicilər köçürülüb, xəstənin həyatı xilas edilib.

Əməliyyat mama-ginekoloq Ayelita Dadaşova tərəfindən icra olunub. Xəstə qəbul edilərkən vəziyyəti kritik qiymətləndirilib və təcili təxirəsalınmaz olaraq müvafiq əməliyyataqədərki hazırlıqdan sonra xəstə əməliyyata alınıb. Bu zaman qadında sağ borunun ektopik hamiləliklə əlaqədar cırılması və daxili qanaxma aşkar edilib. Həkim Ayelita Dadaşovanın peşəkar cərrahi müdaxiləsi nəticəsində xəstənin həyatı xilas edilib.

Xəstənin vəziyyəti yaxşı olaraq qiymətləndirilib və ambulator müalicəyə göndərilib.