TƏBİB tərəfindən tibb müəssisələrində göz xəstəliklərinin müayinə və müalicəsinin inkişaf etdirilməsi istiqamətində tədbirlərin görülməsi davam etdirilir.

Gəncə Şəhər Birləşmiş Xəstəxanasının nəzdində olan Akademik Zülfüqar Məmmədov adına xəstəxananın Oftalmologiya şöbəsində ilk dəfə Paul qlaukoma implantasiya əməliyyatı icra olunub.

Bu barədə Aztibb.az-a Gəncə ŞBX-dan məlumat verilib.

Tibb üzrə fəlsəfə doktoru, oftalmoloq-cərrah Tələt Nəbiyev və onun komandası tərəfindən baş tutan əməliyyat tibb müəssisəsinə qlaukoma diaqnozu ilə müraciət edən 1960-cı il təvəllüdlü pasiyent üzərində həyata keçirilib. Əməliyyat nəticəsində pasiyentin gözdaxili təzyiqi normallaşıb və həyat keyfiyyəti yüksəlib.

Qeyd edək ki, şöbə müasir tibbi avadanlıqlarla, zəruri preparat və dərman vasitələri ilə təchiz olunub. Bölmədə katarakta, sinustrabekuloektomiya, DSR, xalazion, pteriqium, göz qapağının plastik əməliyyatları, qapağın ektropion, entropion əməliyyatları, göz travmaları əməliyyatları baş tutur. Eyni zamanda burada həkim-oftalmoloqlar tərəfindən Avastin inyeksiyası da icra olunur.

Məlumat üçün bildirək ki, TƏBİB-in bütün tabeli tibb müəssisələrində icbari tibbi sığortanın Xidmətlər Zərfinə daxil edilən göz xəstəliklərinin müayinə və müalicəsi ödənişsiz qarşılanır.