Arıqlamaq arzusunda olanların çoxu adətən gecələr ac yatmağa üstünlük verirlər. Lakin gecə aclığı bir sıra sağlamlıq problemlərinə - yuxu pozğunluğundan tutmuş maddələr mübadiləsinin zəifləməsinə qədər gətirib çıxara bilər.

Aztibb.az xəbər verir ki, mütəxəssislərin sözlərinə görə, yatmazdan əvvəl aclıq hissi gün ərzində çox yorulduğunuzu və bədəninizin bərpa üçün lazım olan qida maddələrini kifayət qədər almadığını göstərir. Onların fikrincə, aclığı görməzlikdən gəlib yatmaq düzgün deyil. Çünki yuxu zamanı orqanizm özünü bərpa üçün kifayət qədər zülal, yağ, karbohidrat, vitamin və mineral maddələrə ehtiyac duyur. Bu səbəbdən yatmazdan öncə aclıq hissi çox güclü olduqda zülal, yağ, karbohidratlarla zəngin qidalar yeyilməlidir.

Əgər aclıq hissi çox deyilsə, kalorisi az olan qidalar kifayət edə bilər. Bədən enerji çatışmazlığı hiss etdikdə kortizol (stres hormonu) səviyyəsini artırır ki, bu da yuxunun keyfiyyətini pisləşdirir. Üstəlik, əgər orqanizm gecə saatlarında mütəmadi olaraq lazımi qidaları almasa, bu, maddələr mübadiləsinə mənfi təsir göstərir, yəni bədən enerjiyə qənaət etməyə başlayır və yağ yandırma prosesi ləngiyir. Hətta yuxu zamanı bədən zülal çatışmazlığı səbəbindən enerji üçün əzələ toxumasını parçalamağa başlaya bilər.