Cəfəri və şüyüd süfrələrimizin ayrılmaz hissəsidir. Mətbəximizdə özünəməxsus yeri olan bu göyərtilər xörəklərə dad və ləzzət qatmaqla yanaşı, xoş ətri ilə iştahı artırır, həzmi asanlaşdırır. 

Aztibb.az xəbər verir ki, cəfəri K vitamini ilə zəngin olduğundan qanın laxtalanması və sümüklərin möhkəmliyi üçün vacibdir. Həmçinin C vitamini ehtiva edən bu göyərti immunitet üçün güclü antioksidant mənbəyidir. Tərkibindəki A vitamini sayəsində göz və dəri sağlamlığını dəstəkləyir. İltihab əleyhinə flavonoidlər, dəmir və kalium ilə zəngin olduğu üçün isə ürək-damar sisteminə müsbət təsir edir. Bundan əlavə, o, həzmi yaxşılaşdırmaq və nəfəsi təravətləndirmək xüsusiyyətinə malikdir. Şüyüd isə A və C vitaminləri ilə zəngindir, lakin onun əsas fərqi tərkibindəki efir yağlarıdır - məsələn, karvon və limonen. Bu maddələr antibakterial və potensial olaraq xərçəng əleyhinə xüsusiyyətləri ilə tanınır. Həmçinin həzmi yaxşılaşdırır, spazmları aradan qaldırır, qarında qaz və şişkinliklə mübarizə aparır.

Kalsium və manqanla da zəngin olduğundan sümüklər üçün faydalıdır. Hər iki göyərti "superfood" - yəni ən faydalı qidalar kateqoriyasına aiddir. Əgər 100 qram üçün vitamin göstəricilərinə nəzər yetirsək, cəfəri daha çox K və C vitamini ehtiva edir. Lakin şüyüd efir yağları sayəsində xüsusilə həzm və əsəb sistemi üçün terapevtik təsirə malikdir. Nəticədə bu bitkilər bir-biri ilə rəqabət aparmır - bir-birini tamamlayır. Söhbət hansı daha yaxşıdır sualından yox, sizə hansı bioloji aktiv maddələrin daha çox lazım olduğundan gedir. Ən yaxşısı hər iki göyərtini gündəlik qida rasionuna daxil etməkdir.