“Semaglutid” artıq piylənmə və şəkərli diabetin müalicəsində effektivliyi sübut edilmiş GLP-1R agonistləri qrupuna aid dərmandır. Qida qəbulunun və bədən çəkisinin azalmasına səbəb olan bu preparat, eyni zamanda, ürəkbulanma və əzələ itkisi kimi xoşagəlməz əks təsirlərə də səbəb ola bilir. Bir qrup tədqiqatçı “semaglutid”in beyindəki konkret təsir mexanizmini araşdıraraq bu dərmanın hansı neyronlar vasitəsilə fəaliyyət göstərdiyini ortaya çıxarıblar.

Aztibb.az medicalxpress.com-a istinadla xəbər verir ki, tədqiqat siçanlar üzərində aparılıb. Alimlər dərman tətbiq etmədən “semaglutid”in aktivləşdirdiyi sinir hüceyrələrini süni şəkildə stimullaşdırıblar. Nəticədə bu neyronların aktivləşdirilməsi siçanlarda dərmanla müşahidə edilən qida qəbulunun azalması və çəki itkisi kimi əlamətlərin baş verdiyini göstərib. Əksinə, həmin sinir hüceyrələri zədələndikdə dərmanın iştaha və yağ itkisinə təsiri əhəmiyyətli dərəcədə zəifləyib. Qeyd olunmalıdır ki, bu zaman ürəkbulanma və əzələ itkisi kimi əks təsirlər davam edib.

Araşdırma nəticəsində müəyyən edilən sinir hüceyrələri beyində, daha dəqiq desək, beyin sapının dorsal vagal kompleksi adlanan bölgəsində yerləşir. Bu nəticələr yalnız daha hədəflənmiş və təkmilləşdirilmiş müalicə imkanlarının inkişafına töhfə vermir, həm də “semaglutid”in beyindəki fəaliyyət mexanizmləri ilə bağlı fundamental elmi anlayışları genişləndirir.

Bu araşdırma “semaglutid” kimi dərmanların neyrobioloji təsirlərinin başa düşülməsi və daha təhlükəsiz və effektiv müalicə strategiyalarının inkişafı istiqamətində mühüm addım hesab olunur.