Hər il mayın 25-i cəmiyyətin diqqətini qalxanabənzər vəzin xəstəliklərinin vaxtında aşkarlanması və inkişafının qarşısının alınmasına cəlb etmək məqsədilə Ümumdünya Qalxanabənzər Vəzi Günü kimi qeyd edilir.

Aztibb.az xəbər verir ki, qalxanabənzər vəzi (tiroid vəzi) boyunun ön-orta hissəsində yerləşən, hormon ifraz edən orqandır. Çəkisi 20-30 qr. ağırlığında olub, boyunun orta xəttinin sağ və solunda yerləşən iki lobdan, həmçinin bu lobları birləşdirən “isthmus” adlanan hissədən ibarətdir.

Qalxanabənzər vəzinin funksiyasının pozulması zamanı orqanizmdə bir sıra dəyişikliklər müşahidə olunur. Vəzin fəaliyyətinin zəifləməsi (hipotiroidizm) halında çəki artımı, dəridə quruluq, saç tökülməsi, halsızlıq, qəbizlik və yuxululuq kimi əlamətlər meydana çıxır. Əksinə, vəzin funksiyası artdıqda (hipertiroidizm və ya zəhərli zob) isə çəki itkisi, tərləmə, əsəbilik, əllərdə əsmə, ürəkdöyünmənin sürətlənməsi və təngnəfəslik müşahidə oluna bilər. Bu hallar bir çox amillərlə – yod çatışmazlığı, stres, hormonal pozuntular, zərərli vərdişlər, infeksiyalar və genetik faktorlarla əlaqəli ola bilər. Xəstəliklərin vaxtında aşkarlanması üçün hormon analizləri və ultrasəs müayinəsi mütləq şəkildə aparılmalıdır.