Respublika Təcili və Təxirəsalınmaz Tibbi Yardım Mərkəzinin Xətai TTTYS bölməsinin təcrübəli həkimi, Şəhriyar Məhərrəmov Əşrəf oğlu uzunmüddətli, qüsursuz və səmərəli fəaliyyəti, eləcə də 65 illik yubileyi münasibətilə Fəxri Fərmanla təltif edilib.

Mərkəzdən Aztibb.az-a verilən məlumata görə, Şəhriyar həkim təkcə ölkəmizdə deyil, beynəlxalq səviyyədə də nüfuz qazanmış mütəxəssisdir. O, Böyük Britaniya Dəniz Assosiasiyalarının Azərbaycandakı – Bibiheybətdə yerləşən BP (British Petroleum) platformasında ekspert həkim kimi fəaliyyət göstərib. Bu müddət ərzində o, yüksək peşəkarlığı və dəqiqliyi ilə həm beynəlxalq, həm də yerli kollektivin etimadını qazanıb.

Beynəlxalq təcrübəsi ilə yanaşı, Şəhriyar həkim Böyük Britaniyadan iki, Bakıda isə altı sertifikat əldə edib. Hər zaman öz üzərində çalışan, bilik və bacarıqlarını inkişaf etdirən bu dəyərli həkim həm də gənc nəslə örnəkdir.

Tibbi biliklərini daim təkmilləşdirən, fövqəladə hallarda soyuqqanlı qərarları ilə həmkarlarının və xəstələrinin rəğbətini qazanan həkim artıq iki dəfə Fəxri Fərmanla təltif olunub.