Qəbələ Rayon Mərkəzi Xəstəxanasında 66 yaşlı pasiyent üzərində dupuytren kontrakturası (əl pəncəsi vətərlərinin ağrısız çapıqlaşma və qısalması) diaqnozu ilə qapalı perkutan dupuytren kontrakturasının ləğvi fasiyotomiya əməliyyatı uğurla icra edilib.

Xəstəxanadan Aztibb.az-a bildirilib ki, bu xəstəlikdən 20 il əziyyət çəkən 66 yaşlı şəxs (kişi cinsli) üzərində aparılan əməliyyat uğurla başa çatıb.

Əməliyyatdan sonra xəstəyə lazımi tibbi xidmət göstərilib və vəziyyəti qənaətbəxş qiymətləndirildiyindən o, ambulator müalicə üçün evə buraxılıb.

Sözügedən əməliyyat həkim-travmatoloq-ortoped Azər İlyasov tərəfindən həyata keçirilib.

Qeyd edək ki, TƏBİB regionlarda ixtisaslaşdırılmış tibbi xidmətlərin keyfiyyətinin yüksəldilməsi, xəstəxanaların müasir texnoloji avadanlıqlarla təchiz edilməsi və müxtəlif cərrahi əməliyyatların icrası üçün zəruri şəraitin yaradılması istiqamətində tədbirləri davam etdirir.