Qidalanma ilə əlaqəli diabet növü olan '5-ci tip diabet' Beynəlxalq Diabet Federasiyası tərəfindən rəsmi olaraq tanınıb.

Aztibb.az-ın medimagazin.com.tr-yə istinadla məlumatına görə, mütəxəssislər 5-ci tip diabetin uşaqlıqda yaşanan qida çatışmazlığı səbəbindən mədəaltı vəzinin yetərincə inkişaf etməməsi nəticəsində meydana gəldiyini bildiriblər.

Bu vəziyyət bədənin kifayət qədər insulin istehsal etməməsinə səbəb olur. Mütəxəssislər deyirlər ki, bu tip diabet tez-tez səhv diaqnoz qoyulur və çox vaxt 1-ci və ya 2-ci tip diabet kimi qiymətləndirilir. Bununla belə, klassik diabet növlərindən fərqli olaraq, tip 5 diabet aşağı dozalı insulin və ya oral dərmanlarla müalicə edilə bilər. Bu xəstələrdə yüksək dozada insulinin qəbulunun qan şəkərinin ciddi şəkildə aşağı düşməsinə səbəb ola biləcəyi vurğulanır.

Daha əvvəl 1955-ci ildə təsvir edilən və 1985-ci ildə Ümumdünya Səhiyyə Təşkilatı tərəfindən müvəqqəti olaraq qəbul edilən bu xəstəlik 1999-cu ildə təsnifatdan çıxarılıb. Ancaq son araşdırmalarla xəstəliyin fərqli bir diabet növü olduğu aydın olub. Yeni tərifin dünyada 20-25 milyon insanı əhatə edən bu xəstəliyin daha dəqiq diaqnozu və uyğun müalicə üsullarına kömək edəcəyi gözlənilir.