Tibb müəssisələrində göz xəstəliklərinin müayinə və müalicəsinin inkişafı istiqamətində tədbirlərin görülməsi davam etdirilir.

TƏBİB-dən Aztibb.az-a verilən məlumata görə, Yevlax Rayon Mərkəzi Xəstəxanasında gözdə, əsasən, şəkərli diabet xəstəliyi ilə əlaqəli yaranan problemlərin müalicəsində istifadə edilən Avastin inyeksiyasının icrasına başlanılıb.

Avastin inyeksiyası, xüsusilə diabetik retinopatiya, yaşa bağlı makula degenerasiyası və retinal damar patologiyalarının müalicəsində geniş tətbiq olunan effektiv terapiya üsuludur. Bu müalicə metodu torlu qişada patoloji damarların proliferasiyasını və ekstravazasiya nəticəsində yaranan ödəmi azaldaraq, xəstələrin görmə funksiyasının qorunmasına və vizual reabilitasiyasına mühüm töhfə verir.

Qeyd edək ki, tibb müəssisəsində Avastin inyeksiyası ilə yanaşı, oftalmoloji əməliyyatlar - katarakta, qlaukoma, çəplik (şaqul göz pozğunluğu), pterigium (göz ağında ət böyüməsi), entropion və ektropion (göz qapağının içə və çölə dönməsi), xalazion (göz qapağında kist və ya iltihab) da icra olunur.

Məlumat üçün bildirək ki, Yevlax Rayon Mərkəzi Xəstəxanası da daxil olmaqla, TƏBİB-in bütün tabeli tibb müəssisələrində icbari tibbi sığortanın Xidmətlər Zərfinə daxil edilən göz xəstəliklərinin müayinə və müalicəsi ödənişsiz qarşılanır.