Kaliforniya Universitetinin alimləri gündəlik qida rasionunda yumurta istehlak edənlərin sağlamlıq vəziyyətini araşdırıblar. Mütəxəssislər bu qidanın xüsusilə qadınların idrak funksiyalarına müsbət təsirini müəyyən ediblər.

Aztibb.az-ın xəbərinə görə, araşdırmada 55 yaşdan yuxarı 890 nəfər iştirak edib və onların qidalanma vərdişləri ilə yaddaş, diqqət, digər beyin funksiyaları arasındakı əlaqə öyrənilib. Müntəzəm olaraq yumurta yeyən qadınlarda semantik yaddaş və idrak funksiyalarının azalmasına daha nadir halda rast gəlinib. Kişilərdə bu cür birbaşa əlaqə aşkar edilməsə də, yumurta qəbulunun beyin funksiyalarına yaxşı təsir göstərdiyi sübut edilib. Bu nəticələr yumurtanın zehni fəaliyyətin qorunmasında mühüm rol oynaya biləcəyini göstərir.

Bəzi tənqidlərə baxmayaraq, ekspertlər qeyd ediblər ki, yumurtanın yüksək xolesterin tərkibi əksər insanlar üçün təhlükəli deyil. Onlar yumurtanın müntəzəm istehlak edilməsinin sağlamlıq üçün vacib olduğunu bildiriblər. Gündə 1-2 yumurta yemək beyin üçün faydalı və təhlükəsiz hesab olunur.