Çox yaxında optik eynək və kontakt linzalar tarixə qovuşa bilər.

Aztibb.az xəbər verir ki, Cənubi koreyalı alimlər oftalmologiyada inqilab edərək zədələnmiş göz toxumasının təbii bərpa prosesini işə salan eksperimental dərman - "göz eliksiri" hazırlayıblar.

Görmə itkisi müasir tibdə ən çox yayılmış və mürəkkəb problemlərdən biridir. Müxtəlif xəstəliklər, xəsarətlər və ya yaşla bağlı dəyişikliklər görmənin geri dönməz şəkildə pisləşməsinə, hətta tam korluğa səbəb ola bilər. İndiyə qədər bu istiqamətdə əsas müalicə üsulları korreksiya (eynək, kontakt linzalar), cərrahi müdaxilə və ya xəstəliyin gedişatını ləngitməyə yönəlmişdir.

Lakin bu dəfə tədqiqatçılar problemi kökündən həll etmək üçün xüsusi olaraq Prox1 zülalına yönəlmiş unikal dərman hazırlayıblar. Tədqiqatlar göstərib ki, məhz bu zülal müəyyən şərtlər altında tor qişanın sinir hüceyrələrinin özünü bərpa qabiliyyətinə maneə törədə bilər. Mütəxəssislər yeni dərmanı tətbiq etməklə zülalın fəaliyyətini bloklayıblar. Bu, gözün öz hüceyrələrinə zədələnmiş retinanın bərpası prosesini işə salmağa imkan verib. Dərman siçanlar üzərində uğurla sınaqdan keçirilib. İnsanlar üzərindəki klinik sınaqlar da uğurlu olarsa, bu, qlobal tibbə böyük təsir edəcək.