Azərbaycan Respublikası Səhiyyə Nazirliyinin nümayəndə heyətinin Naxçıvan Muxtar Respublikasına səfəri çərçivəsində bir sıra səhiyyə müəssisələrinə baxış keçirilib.
Səhiyyə Nazirliyindən Aztibb.az-a bildirilib ki, qonaqlar əvvəlcə Dəstək Mərkəzi, Çağrı Mərkəzi və Əziz Əliyev adına Naxçıvan Muxtar Respublikası Mərkəzi Uşaq Xəstəxanasında yeni yaradılan Təcili Tibbi Yardım Şöbəsində yaradılan şəraitlə tanış olublar.
Səfər zamanı Naxçıvan Muxtar Respublikasının Təcili Tibbi Yardım Xidmətinə də baxış keçirilib, burada tətbiq edilən elektron idarəetmə sistemi və göstərilən xidmətlərin operativliyi ilə bağlı yeniliklər təqdim olunub. Daha sonra nümayəndə heyəti Naxçıvan Muxtar Respublikası Xəstəxanasında şəhidlərin adlarını daşıyan yeni təlim otaqları, xəstəxananın konfrans zalı və yaxın zamanda fəaliyyətə başlayacaq Psixoloji Sağlamlıq Mərkəzi ilə tanış olublar.
Səfər çərçivəsində, həmçinin yeni yaradılan və dializ xəstələrinin müasir standartlara uyğun şəkildə tibbi xidmətlə təmin olunmasına imkan verəcək Hemodializ Mərkəzinə də baxış keçirilib.
