ABŞ-ın Binghamton Universitetinin alimləri maraqlı bir fenomenin - barmaqların suda uzun müddət qaldıqdan sonra qırışmasının əsl səbəbini müəyyən ediblər.

Aztibb.az xəbər verir ki, tədqiqatın nəticələri "Journal of the Mechanical Behavior of Biomedical Materials" (JMBBM) jurnalında dərc olunub.

İndiyə qədər qırışların sadəcə suyun dəriyə hopması və onun şişməsi nəticəsində meydana gəldiyi düşünülürdü. Lakin yeni araşdırmanın nəticələri göstərib ki, bu, təkcə mexaniki təsirin nəticəsi deyil. Barmaqlarda qırışların hər insanda eyni qaydada əmələ gəlməsinin əsas səbəbi qan damarlarının xüsusi düzülüş formasıdır. Araşdırma zamanı iştirakçılar barmaqlarını 30 dəqiqə ərzində suda saxlayıblar. 24 saat sonra eyni prosedur yenidən təkrarlanıb. Müqayisələr nəticəsində məlum olub ki, barmaqlarda yaranan qırışların forması hər iki halda tamamilə eynidir. Alimlərin fikrincə, bu sabitlik qan damarlarının strukturunun dəyişməməsi ilə bağlıdır. Damarlar öz yerlərini dəyişmədiyi üçün qırışlar da eyni naxışla formalaşır. Ən maraqlı məqam isə odur ki, orta siniri zədələnmiş şəxslərdə ümumiyyətlə belə qırışlar yaranmır. Alimlər hesab edirlər ki, bu kəşf kriminalistika və tibbdə yeni imkanlar aça bilər. Məsələn, uzun müddət suda qalmış meyitlərdə belə barmaq izlərini müəyyən etmək mümkün ola bilər.

Tədqiqatçılar bu mexanizmin biometrik texnologiyalar və tibb sahəsində başqa hansı praktik faydalar verə biləcəyini araşdırmaq üçün elmi işlərini davam etdirməyi planlaşdırırlar.