Elm adamları ictimaiyyətdə böyük ajiotaj yaradacaq maraqlı bir nəzəriyyə irəli sürüblər. Onlar gələcəkdə verdiyimiz qərarların keçmiş zamandakı hadisələrə təsir göstərə biləcəyini iddia edirlər. Bu isə səbəb-nəticə əlaqəsinin ənənəvi anlayışına meydan oxuyur.

Aztibb.az xəbər verir ki, indiyə qədər düşünülürdü ki, bütün hadisələr yalnız bir istiqamətdə - keçmişdən gələcəyə doğru baş verir. Yəni seçimimiz yalnız onu etdikdən sonra qüvvəyə minir. Lakin tədqiqatçılar hesab edirlər ki, əslində bizim gələcək qərarlarımız daha əvvəl baş verən hadisələrə təsir edə bilər. Müasir zaman anlayışı səbəb-nəticə əlaqəsini nəzərdə tutur: Bir səbəb müəyyən nəticələrlə bitən hadisələri doğurur. Bu hadisələr ardıcıllıqla keçmişdən gələcəyə doğru inkişaf edir. Qəbul etdiyimiz qərarların nəticələrini gələcəkdə görürük və onlar artıq baş vermiş hadisələrə təsir göstərə bilməz. Lakin alimlərin fikrincə, bu, mümkün ola bilər. Fiziklər yeni nəzəriyyəni retrosəbəblik (retrocause) adlı hadisəni araşdıraraq irəli sürüblər. Araşdırmaya əsasən sonrakı qərarlar əvvəlki qərarları görünməz şəkildə idarə edə bilər. Alimlər hesab edirlər ki, əgər retrosəbəblik anlayışı doğrudan da mövcuddursa, o zaman onu xüsusi qurğularla idarə olunan şəraitdə aşkar etmək mümkündür. Zamanın geriyə doğru hərəkətini nəzərə almağa çalışan riyazi strukturlar da var. Tədqiqatçılar düşünürlər ki, əgər gələcəyin indiki zamanla qarşılıqlı əlaqəsini daha dərindən öyrənsələr, bu, tamamilə yeni texnologiyaların yaradılması üçün imkanlar aça və kvant fizikası ilə bağlı bəzi sirləri aydınlaşdırmağa kömək edə bilər.