Bu günlərdə ATU-nun Tədris Cərrahiyyə Klinikasında nadir hallarda həyata keçirilən cərrahiyyə əməliyyatı icra olunub.

Bu barədə Aztibb.az-a Urologiya kafedrasının müdiri, professor Rauf Nağıyev məlumat verib.

Onun sözlərinə görə, 59 yaşında qadın son bir il ərzində sol bel nahiyəsində daimi küt ağrılardan, sol böyrü üstə yata bilməməkdən şikayətlənirmiş: “Eyni zamanda, qan təzyiqi daim oynayır, hətta 180-190-a qalxaraq, birdən 100-ə düşürdü. Müayinələr nəticəsində xəstədə sol böyrəküstü vəzin dörd santimetrə yaxın törəməsi aşkar edildi. Onun laparoskopik, yəni qapalı üsulla əməliyyat olunması qərara alındı. 1 saat 18 dəqiqə davam edən əməliyyatda qan itkisi 20-30 qram, yəni sıfıra yaxın oldu və heç bir fəsad baş vermədi. Xəstə günyarım sonra kafi vəziyyətdə evə yazıldı”.

Professor bildirib ki, böyrəküstü vəzin əməliyyatı çox mürəkkəb sayılır: “Çünki bir tərəfdə qarın aortası, mədəaltı vəzin quyruğu, yuxarıda dalaq, sağda böyrəyin özü, bir sözlə, bu nahiyə çox təhlükəli yerdir. Onu da nəzərə çatdırım ki, bu əməliyyatla birgə narkozun idarə edilməsi kifayət qədər mürəkkəb prosesdir. Belə ki, böyrəküstü vəzin diseksiyası zamanı təzyiq bəzən 300-ə qədər yüksələ bilir. Əməliyyat zamanı başda Şöhrət Sultanov olmaqla anestezioloji idarəetmə də yaxşı təşkil olundu və heç bir problem yaranmadı”.