Səhiyyə Nazirliyi Respublika QİÇS-lə Mübarizə Mərkəzinin (RQMM) təşəbbüsü ilə 2 nömrəli Bakı Baza Tibb Kollecində Bakı şəhəri və regionlardan peşə hazırlığına, təkmilləşdirmə kurslarına cəlb olunmuş 250-dək tibb bacısı İİV-lə bağlı maarifləndirilib, müayinə aksiyası keçirilib.

Bu barədə məlumat Aztibb.az-a RQMM-dan verilib.

Qeyd olunub ki, tədbir iştirakçılarına sağlamlığa ciddi təhlükə olan İİV (İnsanın İmmunçatışmazlığı Virusu) və QİÇS (Qazanılmış İmmun Çatışmazlığı Sindromu) haqqında məlumat verilib. RQMM-in mütəxəssisi Dilşad Mahmudova xəstəlik və virusun yoluxma yolları, profilaktikası, müayinəsi və müalicəsi ilə bağlı təqdimatla çıxış edib. Həkim Azərbaycandakı mövcud epidemioloji vəziyyətə aydınlıq gətirib, tibb bacılarının qan nümunələri ilə təhlükəsiz davranışı məsələlərinə diqqət çəkib. Mərkəzdə müayinə və müalicənin anonim, ödənişsiz qaydada icra olunduğu xatırladılıb.

Mütəxəssisə ünvanlanan fərdi suallar cavablandırılıb. İİV/QİÇS-ə aid broşurlar, bukletlər paylanıb.
Həmçinin təşkil edilən səyyar tibbi müayinə məntəqəsində tibb bacılarına İİV-ə ekspress-testdən keçmək imkanı yaradılıb.