Almaniyanın Helmholtz Tədqiqat Mərkəzləri Assosiasiyasının alimləri yeni bizmut əsaslı hibrid materiallar əsasında yüksək həssaslığa malik, ətraf mühitə zərərsiz rentgen detektorları hazırlayıblar.

Aztibb.az www.sciencedaily.com-a xəbər verir ki, rentgen texnologiyasında istifadə edilən mövcud detektorlar əsasən qeyri-üzvi birləşmələrə əsaslansa da, Berlin Helmholtz Mərkəzindən professor Olena Maslyanchukun rəhbərlik etdiyi tədqiqat qrupu bu sahəyə innovativ yanaşma təqdim edib.

Onlar sulfonium kationları ilə sabitləşdirilmiş iki yeni bizmut əsaslı üzvi-qeyri-üzvi hibrid birləşməni sınaqdan keçirərək, onların kommersiya məqsədli detektorları ilə müqayisədə 100 dəfə daha həssas olduğunu sübut ediblər. Ekoloji cəhətdən təmiz olan bu materiallar ətraf mühitə zərər vermədən "ball milling" üsulu ilə hazırlanır və yüksək dozalı radiasiyaya davamlıdır.

Tədqiqatçılar ümid edirlər ki, bu texnologiya Adlershof texnoloji parkındakı şirkətlərlə əməkdaşlıq sayəsində kommersiyalaşdırılaraq tibbi diaqnostikada və sənaye tətbiqlərində daha təhlükəsiz və effektiv rentgen görüntüləmə imkanları yaradacaq.