Səhiyyə Nazirliyi İctimai Səhiyyə və İslahatlar Mərkəzində (İSİM) Ümumilli lider Heydər Əliyevin anadan olmasının 102-ci ildönümünə həsr edilmiş tədbir keçirilib.

 

İSİM-dən Aztibb.az-a verilən məlumata görə, tədbirdə səhiyyə işçiləri, Azərbaycan Tibb Universitetinin (ATU) müəllim və tələbələri iştirak ediblər.

 

Ulu Öndərin əziz xatirəsini dərin ehtiramla yad edən tədbir iştirakçıları “Ümummilli lider Heydər Əliyev və Azərbaycan səhiyyəsi” mövzusunda sərgi ilə tanış olublar. Sərgidə Ulu Öndərin səhiyyə və tibb müəssisələrində çəkilən, səhiyyə işçiləri ilə görüşlərini əks etdirən fotolar nümayiş edilib.

 

Daha sonra iclas zalında davam etdirilən tədbirdə Azərbaycan Respublikasının Dövlət Himni səsləndirilib, Ulu öndər Heydər Əliyevin, ərazi bütövlüyümüz, müstəqilliyimiz, suverenliyimiz, uğrunda şəhidlik zirvəsinə ucalmış qəhrəmanlarımızın əziz xatirəsi bir dəqiqəlik sükutla yad olunub.

 

İSİM-in direktoru Qəhrəman Haqverdiyev açılış nitqi ilə çıxış edərək bildirib ki, Azərbaycan xalqının böyük oğlu Heydər Əliyevin rəhbərliyi ilə, səhiyyəmizin müasir tələblər səviyyəsində yenilənməsinə və insanların sağlamlıqlarının qorunmasına xidmət edən 15-dən çox qanun qəbul olunub: “Səhiyyə marifləndirilməsi, əhalinin tibbi məlumatlılığının artırılması istiqamətində görülən işləri Ulu öndər yüksək qiymətləndirir, çıxışlarında vurğulayırdı ki, həkim, səhiyyə təkcə insanları müalicə etmək üçün yox, həm də xəstəliklərin qarşısını almaq, geniş profilaktik iş aparmaq üçündür”.

 

İSİM-in Səhiyyə kommunikasiyası şöbəsinin müdiri Laura Quliyeva, ATU-nun müəllimi Arzu Mehdiyeva və İctimai səhiyyə fakültəsinin tələbəsi Natəvan İmanzadə çıxış edərək, Ulu öndərin bilavasitə rəhbərliyi ilə ölkəmizin səhiyyə sistemində ardıcıl və məqsədyönlü görülən işlərdən söz açıblar. Vurğulanıb ki, Azərbaycan xalqının hər bir nümayəndəsinə doğmalıqla yanaşan Ulu öndər gənc nəslin sağlam inkişafını daim diqqətdə saxlayıb, xalqımızın demoqrafik göstəricilərinin yaxşılaşması üçün qətiyyətlə mübarizə aparıb. Müdrik dövlət rəhbəri Heydər Əliyevin siyasi xəttinin bu gün uğurla davam etdirildiyi, əhalinin sağlamlığının qorunması, xalqımızın həyat səviyyəsinin yaxşılaşdırılması, orta ömür müddətinin uzanmasına xidmət edən tədbirlərin həyata keçirildiyi diqqətə çatdırılıb.

 

Yekunda Ulu öndərin səhiyyə və tibb müəssisələrinin açılışındakı fotoları əsasında İSİM tərəfindən hazırlanan video nümayiş olunub, Ümumilli lider Heydər Əliyevin nitqləri və fotoları əsasında hazırlanaraq çap edilən nəşrlər iştirakçılara təqdim edilib.