Qida dəyərinə, liflə zənginliyinə və ən əsası xərçəng əleyhinə təsirinə görə təriflənən qəhvəyi düyü ağ düyüdən daha sağlam hesab edilir. Lakin Miçiqan Dövlət Universitetinin alimləri bu düyünün, hətta xərçəngə səbəb olduğunu aşkar ediblər.

Aztibb.az xəbər verir ki, ABŞ-da yetişdirilən düyü nümunələri üzərində aparılan analizlərin nəticələri göstərib ki, qəhvəyi düyünün xarici qatında - yəni kəpəyində zərərli anorganik arsenin miqdarı daha yüksəkdir. Alimlər müəyyənləşdiriblər ki, qəhvəyi düyüdə zərərli anorganik arsenin payı 48 faiz, ağ düyüdə isə bu göstərici 33 faiz təşkil edir. "Lancet Planetary Health" jurnalında dərc edilən araşdırmaya görə, düyüdə arsen miqdarı iqlim dəyişikliyi səbəbindən artır. Bu, xüsusilə Asiya ölkələrində 2050-ci ilə qədər milyonlarla insanı xərçəng riski ilə üz-üzə qoya bilər. ABŞ-ın Kolumbiya Universitetinin alimləri bildirirlər ki, temperaturun 2 dərəcədən yuxarı qalxması və atmosferdəki karbon dioksid səviyyəsi arsen kimi zərərli maddələrin düyü dənələrinə daha asan keçməsinə şərait yaradır.

Qeyd edək ki, düyü müxtəlif arsen formaları ehtiva edir - həm orqanik, həm də anorganik. Anorganik arsen insan üçün təsdiqlənmiş kanserogendir, yəni xərçəng riskini artırır. Düyü torpaqdakı və sudakı anorganik arsenin böyük hissəsini hopdura bilir. Çünki o, çox məsaməli bitkidir və su ilə dolu sahələrdə yetişdirilir. Qəhvəyi düyü bu zərərli arsen formasını öz xarici təbəqəsində topladığı üçün onu yeyən insanlar xərçəng yaradan maddəyə daha yüksək səviyyədə məruz qalırlar.